Курчак театрында чын талантлар пәрдә артында кала дисәк, һич арттыру булмас. Чөнки артистлар курчак артына яшеренә, ә менә балага могҗиза бүләк иткән курчакларны кем тудыруын без бөтенләй белмибез. Биредә рәссам режиссер белән бер дәрәҗәдә. Шулай булмый ни, режиссерга “артист”ларны ул ясап бирә ләбаса. Алай гына да түгел, бер рольгә берничә курчак әзерләнергә дә мөмкин. Әйтик, “Әлфия” спектакленә Әлфия Авзалованы унсигез төрле итеп иҗат иткәннәр! Бүген без курчак театрының күзгә күренмәгән геройлары белән аралаштык.